Jiyana Azad Wê Bi Ronesansê Pêk Were

Jinên êzidî ku ev 11 sal in ji her alî ve xwe bi rêxistin dikin û li dijî her cure êrîşan li ber xwe didin û pêşengtî ji civakê re dikin, di 28’ê tebaxê de li Şengalê bi pêşengtiya Tevgera Azadiya Jinên Êzidî (TAJÊ) bi dirûşma ‘Bi rêxistin û têkoşînê em ê bibin pêşengên civaka demokratîk û azad’ Komxebata Ronesansa Jinên Êzidî pêk anîn. Di komxebatê de jinên êzidî mijarên wek pirsgirêkên zîhniyetê, zayendperestî, kuştina jinan, bandora fermanê ya li ser jinan, piştî fermanê rewşa jinan, xweparastin û di pêkanîna ronesansê de roja jinan, niqaş kirin.

Ji beşdarvana komxebatê Berdevka Meclîsa Jin a Guhbel Zozan Simo ji malpera me re axivî û ev nirxandin kir: “Em vê komxebatê diyarî Serok Apo û hemû şehîdên şoreşê dikin. Ev ji bo me karekî  pîroz e ku em ji bo ronesansa civaka Êzidî bi 100 jin li navenda Şengalê komxebatekî bi vî rengî lidarxistin ev komxebat jî bi saya fikir û felsefeya Serok Apo hatiye lidarxistin. Nameya ji bo jinên Êzidî hatiya em gelek pê kêfxweş bûn heya niha jî em li ba malan digerînin. Piştî fermanê em ji taritiyê derketin û ber bi ronahiyê ve meşiyan ew ronahî jî ev fikir bû. Ger ku beriya fermanê rê li me û azadiya me nehatiba girtin û em ji jiyanekî azad bêpar nemaban wê tu carî ferman bi ser me de nihatiba. Em dixwazin jin û zilam werin rêzekê û tu zilaman ji jinan mezintir nebînin. Em parçeyek ji banga aştî û civaka demokratîk in, em jinên Êzidî berhemê fikirê Serok Apo ne. Her kar û xebatekî ku em li Şengalê didin meşandin xwedîderketina li Serok Apo ye.  Ev 11 sal in em têdikoşin û xwe birêve dibin, ger ku em xwedî li vê fikrî derkevin em ê li çanda Êzdatiyê xwedî derkevin û berdewam bikin.”